Hörmüz boğazında tankerdə yanğından sonra “Brent” 117 dollara çatıb

Hörmüz boğazında tankerdə baş verən yanğın və Yaxın Şərqdə gərginliyin artması fonunda “Brent” markalı neftin bir barelinin qiyməti cümə günü Asiya ticarətində 117 ABŞ dollarına çatıb. Bu barədə BusinessTime “OilPrice”a istinadən xəbər verir.

Böyük Britaniyanın Kral Hərbi Dəniz Qüvvələrinə bağlı Dəniz Ticarəti Əməliyyatları qurumu bildirib ki, cümə axşamı boğazdan çıxan tankerdə yanğın qeydə alınıb. Hadisə Oman sahillərindəki Xəsəb şəhərindən 25 dəniz mili şimal-şərqdə baş verib.

Qurumun məlumatına görə, kiçik bir qayıq tankerin sol tərəfinə yaxınlaşaraq su xəttindən yuxarı gövdəyə iki partlayıcı qurğu yerləşdirib. Partlayışlardan sonra mühərrik otağında yanğın başlayıb və gəmi müvəqqəti hərəkətsiz qalıb. Yanğın sonradan söndürülüb, tanker növbəti limana doğru yolunu davam etdirib.

Qurum təsdiqlənmiş məlumata əsasən heyətin təhlükəsiz olduğunu və ətraf mühitə zərər dəymədiyini də açıqlayıb.

İranın İslam İnqilabı Keşikçiləri Korpusu isə cümə axşamı dörd tankerin Hörmüz boğazında minaya düşdüyünü iddia edib. Qurum ABŞ Mərkəzi Komandanlığının əsas tranzit marşrutlarının minalardan təmizlənməsi barədə açıqlamasını mübahisələndirib.

Neft qiymətlərinə bölgədə yenidən artan gərginliklə yanaşı, husilərin Səudiyyə Ərəbistanının infrastrukturuna davam edən hücumları da təsir göstərib. Mənbənin məlumatına görə, neft ardıcıl dördüncü ayı qiymət artımı ilə başa vurmağa doğru gedir.