"DDLAR İnşaat" 2025-ci ili 1 milyon manata yaxın xalis zərər ilə başa vurub
"DDLAR İnşaat" QSC 2025-ci ili 960 min 240 manat xalis zərər ilə başa vurub. Şirkət 2024-cü ildə nə xalis zərər, nə də xalis mənfəət əldə etmişdi. "DDLAR İnşaat" 2023-cü ildə isə 1 milyon 382 min manat xalis zərər ilə üzləşmişdi.
Marja.az xəbər verir ki, "DDLAR İnşaat" QSC-nin əsas əməliyyat gəlirləri 2024-cü ildə 12 milyon 167 min manat ikən, 2025-ci ildə 12 milyon 244 min manata yüksəlib (76 min manat və ya 0,6% artıb).
Ötən il "DDLAR İnşaat"ın cəmi əməliyyat xərcləri 13 milyon 204 min manat təşkil edib. Şirkətin xərcləri gəlirlərini 960 min manatdan çox üstələyib. 2024-cü ildə "DDLAR İnşaat"ın cəmi xərcləri 12 milyon 45 min manat olmuşdur. Kommersiya və digər xərclərin artması Şirktin xalis zərər ilə üzləşməsinə səbəb olub.
"DDLAR İnşaat" QSC 31 dekabr 2025-ci il tarixində 8 milyon 54 min manat cəmi aktivlərə malik olub. Şirkət 2024-cü ilin sonunda 7 milyon 103 min manat cəmi aktivlərə malik idi.
Qeyd edək ki, "DDLAR İNŞAAT" QSC tikinti şirkəti olmaqla yanaşı, müxtəlif bazar seqmentlərində təmsil olunaraq, memarlıq, daşınmaz əmlak və beton istehsalı ilə məşğul olur. Şirkət “Premium” və “De Lüks” sinifli yaşayış kompleksləri, müxtəlif idman kompleksləri inşa etmiş və bir sıra dövlət layihələrini icra etmişdir.
